سمعت صوتها لاول مرة | I heard her voice for the first time

9:00:00 م




سمعت صوتها لاول مرة | I heard her voice for the first time

في يوم الاحد احسست بألم الولادة وظهرت لي بعض العلامات رحت للدكتورة ودكتورتي اجازتها الرسمية الاحد فعرضوني على دكتورة ثانية (دكتورة رغد) كشفت علي وقالتلي لساعك بدري على الولادة وانتي فالبداية نصحتني بالمشي خرجت من المستشفى واصريت على المشي مشيت لمدة ساعة فالحديقة انا وزوجي ورحت لبيت اهلي وبدت العلامات تظهر طول اليوم وكل ما تقدم الوقت زاد الالم مامتي حبيبتي حضرت كل لحظات الاوجاع وكانت تتوجع معايا وكأنها هيا الي تتألم 😢 شاركتني كل شيء 😭 وما اتخلت عني وكانت تشجعني وتصبرني كنت انا وهيا لحالنا فالغرفة واختي الي اصغر مني الا ودها تكون معانا وكل ماشفتها خرجتها من الغرفة وانا ابكي اقلها والله ماتجلسي كنت خايفة عليها تتعقد من الزواج والحمل خرجت من الغرفة ياقلبي عليها راحت الصالة وتبكي عليا وتدعيلي 😢😭 في احلى من اخت زي كدا وماما كل شوي تعملي خلطات عملتلي ماء ساخن بالقرفة والعسل وشربتني زيت خروع اول مرة فحياتي اشربو طعموو 😵 الله لايذوقة احد وعملت لي ماي دافي فالكروان للرجلي ودهنت بطني زيت زيتون دافي وحبة سودا مرة ريحني وانا اتألم الام شديدة وكل شوي اقلها يالله خلينا نروح المستشفى كل شوي تقلي اصبري ساعة وكمان ساعة وانا 😳 لمى صارت الساعة 4 قلت لها خلاص معاد استحمل قالتلي يالله قومي رحت وقومت زوجي من النوم وماني عارفة اش اقلو خايفة ينفجع ويخاف صحيته قلتلو بروح اراجع المستشفى مرة تعبانه كويس ما انفجع قام وركبنا السيارة والشوارع فاضية وداس على البنزين عرف اني بولد 😂 خاف اولد فالسيارة وانا اقلو هدي لاتسرع الى ان وصلنا المستشفى ودخلنا قسم الطوارئ ..!
الدنيا فاضية وانا داخلة عند الباب جاني الوجع ووقفت فمكاني وماما تشجعني يالله امشي حاولي وكان في زوج وزوجته شافوني بذي الحالة الحمد الله ماكان في احد تاني مشيت وطلعت الدرج الى ان وصلت لغرفة المخاض اعطيتهم ورقة من الدكتورة وقلتلهم ولادة كنت اول وحدة ادخل كانو فاضيين لي الحمد الله مارضيو يدخلو مامتي 😢 هذا اكثر شيء ضايقني دخلت لحالي ومامة وزوجي برى الغرفة في عالم اخر غير عالمي 😟 دخلت والحمد الله قد دخلتها قبل اخت فكرة وشلت العباية ونوموني فنفس السرير الي نمت فيه قبل اسبوع وركبولي جهاز تخطيط قلب البيبي وانا اتألم وقتها الدكتورة ماكانت موجودة وخافو اني اولد الحمد الله بفضل من الله كنت على وشك الولادة جدا متهيأ قالولي امسكي نفسك شوي الا ماتجي الدكتورة وجات الدكتورة ودخلوني غرفة الولادة 😱 مرعبة بشكل كل شيء شفتو وكل شي حسيت فيه بفضل ومنه وكرم ربنا كانت دكتورة ممتازة وبطلة كانت تشجعني وتنصحني اول ماجلست صرخة صرخة 😲 ماما وزوجي سمعوها مامتي تقلي بعدين زوجك اول ماسمع صرختك خاف وارتبك وبطنو وجعتو ويرتجف 😖 ياقلبي عليه حاس فيني غير عن قلب ماما الي جالسة تصلي وتدعيلي وبفضل دعواتها اتسهلت ولادتي الحمد الله وولدت طبيعي الساعة 5 الفجر على قرب الصلاة وقت مناسب وصباح غير ⛅ السستر اخذت البيبي ولفتها فالكوفلة واول مرة اشوفها جابت وجها قدام وجهي وشوي ودخلها فوجهي 😨 وانا في حالة مزرية تقلي بوسة بيبي بستها وشالتها بعيد عني حتى ماشفت ملامحها تمام بعد كذا ماما ماقدرت تستحمل دخلت القسم وجلسو يخاصموها ممنوع ماما ممنوع وهيا تسأل عني وسمعت صوتها قلت للدكتورة بشريها الله يسعدك السستر بشروها بس امي مو مصدقة قالتلي الدكتورة الله يسعدها انتي بشريها 😄 خليها تطمن اكثر قلتلها ياماما انا ولدت الحمد الله ماتسمعي صوت البيبي بعدين ارتاحت لمى سمعت صوتي وخرجت لمى خلصت وكل شيء حطوني تحت الملاحظة يقيسو الضغط وكذا وانا ابغا اشوف مامتي قالو ابدا ممنوع طولت وانا ماني قادرة اوصلها بعد نص ساعة قالولي خلاص حنوديك للغرفة 😀😁 واخيرا طبعا وانا نايمة فالسرير المتحرك غطوني عشان وجود رجال ودفوني كانني جنازة 😞 زوجي قرب مني وهمى مو عارفيينو قالولو حرمة حرمة وماما تقلهم هذي بنتي اشبها كذا خافت لمى سمعت صوتها حركة يدي تحت الغطا عشان تطمن 😊 ودخلوني غرفتي والحمد الله شفت مامتي وزوجي واتطمنو عليا وارتحت ..

يوم ميلاد رُبى :

الإثنين 

تاريخ :

 23 / 1 / 1438  هجري
24 / 10 / 2016 ميلادي

You Might Also Like

2 التعليقات

Follow Us